Shugaban kasar Sin Xi Jinping ya gana da takwaransa na kasar Amurka Barack Obama a ranar jumma'a a fadar White House, inda suka yi musanyar ra'ayi kan wasu manyan batutuwa, ciki hadda dangantakar dake tsakanin kasashen biyu, manufofinsu na gida da na waje da halin da kasa da kasa da shiyya-shiyya ke fuskanta.

Kafin a fara shawarwari, Mista Obama ya yi kasaitaccen walima a fadar ta White House, don yin maraba da Mista Xi sannan kuma, shugabannin biyu sun gabatar da jawabansu.

An ba da labarin cewa, shugaban kasar Sin Mista Xi ya fara yada zangon shi na ziyarar aikin kwanaki hudu a Amurkan a birnin Seattle a ranar Talata, sannan daga bisani birnin Washington DC ya kasance zango na biyu.

Ana sa ran daga baya kuma, Mista Xi zai isa birnin New York don halartar taron koli na cika shekaru 70 da kafuwar MDD. (Amina)