Zane-zanen da manoma Sinawa suka yi, wanda aikin fasaha ne na gargajiya, na kunshe da daukacin burin manoma na more ingantacciyar rayuwa. Dongfeng, wani birni ne a gundumar Liaoyuan, dake lardin Jilin na arewa maso gabashin kasar Sin,wanda ya yi suna saboda zane-zanen da manoma ke yi. Ta hanyar samun asali daga rayuwar kauye da al’adun gargajiya na kasar Sin, matan kauye na zanen abubuwa kamar a zahiri, inda suke nuna kyawun yanayi da dabbobi da alamomi da tsirrai. Ta hanyar ayyukansu, za a iya fahimtar rayuwar jin dadi da kwanciyar hankali irin ta manoma.

Zanen da manoma suke yi a Donfeng, wanda tarihinsa ya kai shekaru sama da 100, na dauke da sigogin al’adun kabilun Manchu da Han, da kuma na sauran kabilun arewacin kasar Sin. Cikin shekaru 100 da suka gabata, masu zane da dama a Dongfeng, sun kirkiro ayyuka masu yawa da suka nuna tsarin rayuwarsu. Ta hanyar irin ayyukan dake dauke da sigogin al’adun Dongfeng, mutum zai iya fahimtar irin abubuwan da suke so. Haka kuma za a iya kara fahimtar al’adunsu.

A shekarun baya-bayan nan, gwamnatin gundumar Donfeng ta dauki wasu dabarun bada gata da kuma kara kudin inganta zanen-zanen manoma. A don haka, fasahar ta kara yin fice. A shekarar 2008, ma’aikatar al’adu ta kasar Sin, ta yi wa Dongfeng lakabi da “cibiyar fasahar gargajiya da al’adu ta kasar Sin”. A 2019 kuma, sashen raya al’adu da yawon bude ido na lardin Jilin, ya yi wa gundumar lakabi da “cibiyar fasahar gargajiya da al’adu ta Jilin”. Zane-zanen manoma na cikin jerin al’adun gargajiya da aka yi gado a lardin Jilin.

A 2019, gidauniyar raya harkokin mata ta kasar Sin ta kaddamar da wani shiri mai suna “Genius Mom” wato “uwa mai baiwa” domin taimakawa mata yaki da talauci ta hanyar sana’o’in hannu.

A watan Oktoban 2020, gidauniyar ta kafa wani dakin nune-nune domin inganta zanen-zanen da aka kirkiro karkashin shirin “Genius Mom” a Dongfeng. Haka kuma, ta gayyato kwararru domin taimakawa matan samar da kayayyakin gargajiya daban-daban, ta hanyar amfani da siffofin zanen-zanen manoma.

An haifi Zhang Mingyun a shekarar 1969 a kauyen Gushan dake Dongfeng. Tun tana karama take matukar sha’awar zane-zane. A cewar Zhang, “Baffana ya hada ni da malamin dake koyar da zane a Dongfeng, shi ya koya min yadda ake zane irin na gargajiya na kasar Sin. Ina jin dadin kwafar zane daga littattafan da nake arowa daga wajensa”.

A wata rana, wata kawar Zhang ta dauko maganar zane-zanen manoma a cikin hira. Wannan ya sa Zhang ta fara son sanin irin zanen. Ba da jimawa ba, ta ziyarci gidan adana kayan tarihi na zane-zanen manoma a Dongfeng. Saboda yadda yanayin zanen ya ba ta sha’awa, da kanta ta koyi irin fasahar da aka yi amfani da ita a zanen na manoma.

Daga bisani, Zhang ta samu damar koyon zane karkashin fitattun masana zane, ciki har da Li Junmin da Yang Shuyou. Bisa irin jajircewarta da kuma basira, nan da nan Zhang ta inganta basirarta. A matsayinta na mai basira da ilimi, a hankali ta kirkiro irin nata salon zane. Saboda dagewarta na inganta zanenta, cikin shekaru sama da 30 da suka gabata, Zhang ta zama daya daga cikin sanannun masu zane a Donfeng. Ita mamba ce ta kungiyar bincike kan zane-zanen manoma a lardin Jilin da na duk kasar.

Zhang ba za ta taba manta wani abu da ya faru a 1997 ba. Bayan ta kammala aikinta na gona, ta koma gida, da maraice. Ta tarar danta mai shekaru 3 ya yi rubutu a kan zanenta. Ta fusata sosai, har ta fashe da kuka. Amma kuma sai ta zana bishiyoyi ko karkanda a wuraren da suka baci. Daga baya, Zhang ta yi farin ciki sosai ganin cewa zanen da ta gyara har ya fi na ainihin kyau.

Bisa tunani da nazarinta game da rayuwa, Zhang ta kirkiro zane-zane masu taken dabbobin Sa da Karkanda, wadanda aka kawata jikinsu da siffofi daban-daban, ciki har da furanni da masara da kwari. Zanen na bayyana fatan mazauna kauye na samun girbi mai armashi da wadata cikin shekara mai kamawa.

Zhang ta kuma kirkiro zane-zane da dama domin nuna manyan sauye-sauyen da suka auku a yankunan karkara a fadin kasar Sin. Misali, a zanenta mai suna “ Shirin Taimakawa Mata Kaucewa Talauci ta Hanyar Fasahohin Hannu”, ta nuna matan kauye da dama a Dongfeng, wadanda ke halartar horon da gwamnatin gundumar da kungiyar mata suka shirya, domin samun ilimin fasahohin hannu.

Cikin shekaru 30 da suka gabata, Zhang ta yi kokarin inganta basirarta ta zane. Ta kuma lashe kyaututtuka da yawa a gasannin da aka yi a matakan kasa da na lardi.

Ban da Zhang Mingyun, zane-zanen manoma su ma sun kyautata zaman rayuwar wasu mazauna kauye mata na daban, ciki har da mata biyu masu suna Liu Li da Liu Fen.

Saboda tasirin mahaifinsu Liu Zhenqi, wanda ke matukar kaunar zane, Liu Li da kanwarta Liu Fen, suka fara sha’awar amfani da burushin fenti don bayyana rayuwarsu.

An haifi Liu Li a 1978 a kauyen Miaosheng na Dongfeng. “saboda iyayena ba masu kudi ba ne, mun sha wahala a shekarun 1970. A 1980 babana ya fara zane, don ya sayar ya biya mana bukatun yau da kullum. A 1994 kuma, ya sayar da zanen da ya yi a birnin Beijing”, cewar Liu Li.

Liu Fen na matukar kaunar mahaifinta, wanda ke da juriya da kuma kyakkyawan fata game da rayuwa. “mahaifinmu ya jure wahala tare da yin aiki tukuru. Kyakkyawar halayyarsa ta ba mu tasiri sosai, wanda ya sa muke da fata mai kyau game da rayuwa da kuma daukar duniya a yadda ta zo maimakon yin korafi.”

Liu Li ta fara koyon zane karkashin Liu Zhenqi a 1998, jim kadan bayan ta kammala makarantar midil. Shekaru kalilan bayan nan, Liu Fen ta bi sahun yayarta wajen koyon fasahar zane a wajen mahaifinsu. “yayin da muke kokarin inganta fasahar mu, karkashin mahaifinmu, mun taimaka masa karbar odan kwastomomi. Mun sayi sabon gida daga kudin da muka samu ta hanyar sayar da ayyukan da mahaifinmu ya yi,” cewar Liu Li.

Yayin da take waiwaye, Liu Li ta yi mamakin yadda lokaci ke gudu. Liu Li da Liu Fen sun yi kokarin bayyana manyan sauye-sauye da suka auku a rayuwar mazauna kauye cikin gomman shekarun da suka gabata. ‘Yan uwan na zaune cikin kwanciyar hankali da wadata sanadiyyar sayar da zanen da suka yi.

Zane-zanen manoma abun burgewa ne, sai dai ba lallai ne ka iya gano irin kokarin da suka yi wajen aikin ba. “yin zane na bukatar abubuwa da yawa, kamar siffanta zanen a jikin takarda da binsa da tawada ko fenti da sauransu. Kwarewa wajen hada launuka shi ne jigon samar da zane mai matukar kyau”, cewar Liu Li, “duk da cewa ba za a taba hada zanen-zanen manoma da na fenti mai maiko ba, ko na gargajiya na kasar Sin, musammam ta fuskar wajen salon fasaha, zanen manoma na bayyana rayuwar mazauna kauye da ra’ayoyinsu kamar a zahiri.”

Bisa la’akari da jajircewarsu kan inganta fasaharsu, ayyukan da suka yi sun sa su zama sanannun a tsakanin kwastamomi da masu zane. Akwai wani zane da Liu Zhenqi da ‘ya’yansa suka yi, da aka nuna a bikin nune nunen zanen manoma na MDD, a birnin New York a watan Mayun 2014. Kallo daya mataimakin sakatare Janar na MDD Peter Launsky-Tieffenthal ya yi wa zanen ya ji ya burge shi, inda ya yanke shawarar sayewa. 

Saboda irin jajircewarsu na inganta fasaharsu, Liu Li da Liu Fen, sun samu karin adadin oda daga kwastomominsu dake fadin kasar Sin. “wani lokaci, mahaifinmu, wanda ke cikin shekaru 70 na taimaka mana yayin da muke aiki ba dare ba rana don kammala ayyukan da aka yi oda a kan lokaci,” cewar Liu Li.

Duk da cewa suna ta kokarin tafiyar da harkokin dakin zane da nune-nune na Dongqi da mahaifinsu ya kafa, Liu Li da Liu Fen sun shirya yayata zane-zanensu ta kafar TikTok da shirin bidiyo na kai tsaye, ta yadda ayyukansu za su kara samun karbuwa tsakanin jama’a.

Wang Jinling, wata mamba ce ta dakin nune-nune da zanen manoma na Donfeng, ta bayyana cewa, “zanen-zanen manoma sun samo asali ne daga yadda manoman suke rayuwa. Ayyukansu na dauke da kuzari da hikima da kuma abun da ke zukatansu. Yin zane na nishadantar da ni.”

Wang na amfani da lokacin da ba ta da wani abun yi wajen yin zane. Domin halartar nune-nunen fasaha, wani lokaci ta kan yi zane da sassafe. “Ta hanyar ayyukana dake bayyana shimfidar Dongfeng, mutane da dama za su fahimci yanayin mahaifata,” cewar Wang.

A lokacin da take karama, Wang ta yanke shawarar sadaukar da rayuwarta wajen cimma burinta, wato zama kwararriya a fannin zane. Tun daga sannan kuma, take mayar da hankali ga abubuwa masu kyau a rayuwa.

Wang ta shafe shekaru da dama cikin wannan aiki da take kauna. “duk da cewa iyayena ba za su iya sayen kayyayakin zane ba, na kan karbi fensir da kaloli daga ‘yan ajinmu a makarantar firamare, don amfani da su wajen zana hotuna a kan littattafaina ko kan takardar sigari,” cewar Wang.

“Duk da sha’awata kan zane, ban samu lokaci mai yawa na nishadantar da kaina ba bayan aure. Wata rana a 2014, daya daga cikin kawayena ta kai ni dakin nune-nunen zanen manoma a Dongfeng. Cikin kankanin lokaci, na halarci kwas na zane da ake yi a dakin. Kwas din ya zaburar da sha’awar da nake da ita kan zane. Yanzu, ina cike da kuzari. Hakika, zane na mayar da ni kamar yarinya”, cewar Wang.

Tana farin cikin kara basira ta hanyar koyon zane. “Yayin da nake kokarin inganta basirata, karkashin masu koyarwa a dakin nune-nunen, na samu karin damammakin samun sabbin abubuwa da dabaru. Wannan ya fadada ilimi na. Haka kuma, na gane cewa yanayin halittu na bayar da kwarin gwiwa ga kirkire-kirkiren fasaha.”

Zane mai suna Rayuwar Kauye na daya daga cikin zane-zanen da suke gamsar da ita. Wani matashi a kan bijimi, cikin tsaunuka masu tsawo, da korayen bishiyoyi da tsuntsaye, wannan ya samar da hoto mai matukar kyau.

Wang na farin ciki da yadda karin hukumomi da daidaikun mutane suka taimaka wajen inganta ci gaban zane-zanen manoma. “ina fatan mata, wadanda ke sha’awarar zane, za su samu karin damammakin koyo daga kwararru, ta yadda za su taimakawa iyalinsu ta hanyar zane-zane,” cewar Wang.

“Ina son sunan shirin wato ‘Genius Mom’, wanda ke nufin, baya ga kula da iyalansu, iyaye mata na da baiwar fasaha. Zan yi kokarin zama uwa ta gari. Zan kuma jajirce wajen nazartar fasahohi da yin karin zane masu matukar kyau,’ cewar Wang.

Tana fatan karin matasan Sinawa za su nazarci aikin zane-zanen manoma, ta yadda za a ci gaba da raya wannan al’ada. Ta kuma ce tana fatan karin mutane a duniya za su fahimci irin kyan dake tattare da aikin fasaha.(Kande Gao)

Saddam Muhammad Ishaq, wani dalibi dan asalin jihar Kanon tarayyar Najeriya ne, wanda a yanzu haka yake karatun neman digiri na biyu a jami’ar Chinese Academy of Sciences wato UCAS a takaice.

Saddam, wanda ya yi shekaru sama da biyu yana karatu a wannan makaranta dake birnin Beijing, ya ce fannin karatun da yake wato nazarin kwayoyin halittu, ko kuma cell-biology a turance, ya kunshi ilmomi da fasahohi na zamani da dama, wadanda ya dace a yi koyi daga kasar Sin, saboda zai kawo alfanu ga rayuwar dan Adam.

A ra’ayinsa, kasar Sin ta samu babban ci gaba a fannoni daban-daban, kuma hakan na da alaka sosai da jajircewa da dagewar da mutanen kasar suke yi.

A karshe, Saddam Muhammad Ishaq ya kuma yi kira ga matasan Najeriya, su tashi tsaye don karo ilimi. Musamman in suna da hali, ya kamata su zo nan kasar Sin don zurfafa karatunsu, da ganewa idanunsu ainihin halin da ake ciki a kasar.(Murtala Zhang)

A kwanakin baya ne, mahukuntan kasar Sin suka sanar da aniyarsu ta kara kaimi wajen ganin an hanzarta raya muhimman gundumomin kasar dake samun tallafi, a kokarin da mahukuntan kasar ke yi na raya kauyuka.

Wannan ne ma ya sa, Hu Chunhua, mataimakin firaministan kasar Sin, kana mamba a hukumar siyasa ta kwamitin koli na JKS, ya yi kira da a kara zage damtse, don ganin an karfafa nasarorin da aka cimma wajen kawar da talauci, tare da tabbatar da cewa, ba a bar dukkan gundumomin kasar a baya ba, a kokarin da ake yi na farfado da kauyukan kasar.

Alkaluma na nuna cewa, baki dayan yanayin ci gaban tattali arziki da jin dadin jama’ar gundumomin kasar Sin, yana mataki na kasa, tun bayan da kasar ta yi nasarar kakkabe matsalar kangin talauci. A don haka, akwai bukatar dora muhimmanci kan wannan aiki, wajen kula, da fadada nasarorin da aka cimma a fannin rage radadin talauci.

Mahukunta sun bayyana cewa, ya kamata a kara yawan kudin shigar mutanen da suka fita daga kangin talauci, da kara yawan tallafin da ake baiwa masana’antu dake yankunan da suka ci gaba, da kara ci gaban tattalin arzikin yankunan.

Bugu da kari, akwai bukatar a hanzarta daukar matakan raya jin dadin jama’a da al’adun gundumomin, gami da raya ilimi da hidimomi na kiwon lafiya. Sauran matakan raya kauyukan, sun hada da kara aikin zakulo masu basira dake zaune a kauyuka, da inganta tsarin kula da tsarin gidaje wadanda haka, zai kai taimaka wajen hanzarta zamanantar da aikin gona, da kayayyakin more rayuwa da kirkire-kirkire a fannin aikin gona.

Masu fashin baki na ganin cewa, matakan kasar Sin ta raya fifikon yankuna, da samar da ababan more rayuwa da sabbin fasahohin zamani, za su taka muhimmiyar rawa ga shirin kasar na raya baki dayan yankunan karkarar kasar kamar yadda aka tsara. (Saminu, Ibrahim/Sanusi Chen)

Wani matashin dan danben Boxing dake kudancin Najeriya mai suna Sultan Adekoya, ya bayyana aniyar bunkasa sana’arsa a nan gaba zuwa matakin kwararru.

Da farko, Sultan Adekoya wanda kan yi gudun motsa jiki a kewayen unguwar da yake, a yankin Egbeda na jihar Lagos, na bin sahun yara kanana da matasa masu motsa jiki a kullum, da nufin bunkasa damar su ta shiga damben Boxing a nan gaba.

Daya daga irin wadannan yara mai shekaru 12 na nuna dabarun wasan boxing, yana kokarin gina karfin damtsen sa, da kai naushi, da kare kai, tare da gwada motsa kafafu da ake bukata yayin wasan, inda kuma yake jiran umarni daga kocin sa Taiwo Adegbite, wanda ke gefe yana yiwa sauran masu yin horo da suka riga shi zuwa gyare gyare.

Adegbite, wanda aka fi sani da koci Tipo, ya bayyana matashi Adekoya a matsayin "Mai karfi da aiki tukuru " wanda kuma ke da matukar basirar damben boxing.

Wasu fayafayen bidiyo na Adekoya a lokacin da yake horo, wadanda aka yada a kafafen sada zamunta, sun ja hankalin masu sha’awar wasan, inda ministan wasanni da harkokin matasa Sunday Akin Dare, ya bayyana matashin a matsayin “Wanda zai zamo muhimmin tauraro a nan gaba".

Da yake karin haske game da makomar dan wasan, koci Tipo ya ce "Mutane sun san shi sosai. Yana da kwazo kwarai da gaske,". Mr. Adegbite wanda ke wannan tsokaci ga kamfanin dillancin labarai na Xinhua, ya ce tuni Adekoya ya shiga wasannin dambe sama da 60, ciki har da na baje fasahohi da akan shirya, ya kuma samu manyan nasarori.

A shekarar 2016, an baiwa Adekoya kambin gasar hukumar shirya wasan dambe ta kasa da kasa wato WBC, bayan da aka amince ya kai matsayin dan wasa da ya nuna alamun zama tauraro na WBC, yayin wasan gabatar da ‘yan wasa masu hazaka da hukumar ta WBC ta shirya. ‘Yan wasan damben boxing a kalla 40 masu shekaru tsakanin shekaru 5 zuwa 16 sun halarci wasan, wanda ya gudana a Lagos.

Koci Adegbite ya kara da cewa, ya na da imini kan Adekoya, duba da yadda matashin ke ci gaba da inganta kwarewarsa, tun daga shekaru 7 da suka gabata ya zuwa yanzu. Ya ce "Sultan ya zo kofar gida na da kan sa, inda muke gudanar da horo. Yana tafiya ne kawai ya hange mu muna yin wasan. A lokacin bai wuce shekaru 5 ba. Sai kawai ya rugo ya dauki safar hannu na ta Boxing, ba tare da ya tambaye ni izini ba. Ya fara kaiwa mutane naushi”.

Kocin ya ce “Sai na cewa Adekoya ya zo da iyayen sa. Na kuma yi mamakin ganin su da sanyin safiyar washe gari. Sun amince dan su ya koyi damben boxing. Tun daga wannan lokaci ne kuma ya fara samun horo."

BURI DA FATAN NASARA

A wata zantawa da ya yi da kamfanin dillancin labarai na Xinhua, Adekoya ya ce "Ina kaunar damben boxing. Ina fatan mayar da boxing sana’a ta". Adekoya ya ma ce gwanayensa a wasan, su ne shahararren dan damben Birtaniya wanda aka haifa a Najeriya wato Anthony Joshua, da kuma dan damben Amurka Floyd Mayweather.

Adekoya na zuwa yin horo tsakanin ranekun Litinin zuwa Juma’a, amma fa bayan ya je makaranta, sai kuma ranekun karshen mako da yake wuni yana yin horo, kana wasu lokutan ma yana halartar gasannin dambe da ake shiryawa.

An haifi Adekoya a unguwar Egbeda ta jihar Lagos, kuma a nan matashin ya rayu tare da iyayensa, da kuma kanwarsa. Dukkanin su na zaune ne a dakin haya tare da wasu iyalai 15 dake zaune a gida guda tare.

Da yake tsokaci kan nasarorin da dan sa ya samu, mahaifin sa Tosin Adekoya, ya ce "Sultan ya jawowa iyalin su farin jini. Ya ce “Mutane da dama kan nuna ni su ce kun gan shi: Shi ne mahaifin Sultan'" Tosin Adekoya wanda ya bayyanawa kafar Xinhua hakan, ya kuma nuna irin lambobin yabo da dan nasa ya lashe, cikin shekarun da ya yi yana wasan dambe, ciki har da kambin hukumar WBC.

Mr. Tosin Adekoya mai shekaru 40 da haihuwa, kuma kwararren bakaniken motoci, ya ce yana goyon bayan sana’ar da dan sa ya zabi yi dari bisa dari.

A cewar Koci Tipo, sana’ar damben boxing a Najeriya na biye da kwallon kafa wajen karbuwa, sai dai banbancin ta da kwallon kafa, wasan boxing a Najeriya dake yammacin Afirka, bai samu cikakkiyar bunkasa ba tukuna; don haka ba kasafai ‘yan wasan boxing masu tasowa ke samun tallafin da ya wajaba ba.

Ya ce duk da cewa akwai ‘yan Najeriya dake wasan boxing, kuma wadanda suka cimma manyan nasarori a gasannin shiyya, da na kasa da kasa, kalilan ne daga cikin su suka samu horo tare da kaiwa matsayin taurari duk a Najeriyar.

Wani kalubalen na daban dake addabar masu horas da ‘yan dambe, a cibiyoyi irin su “Tipo Boxing Academy”, wadda aka kafa shekaru kusan 9 da suka gabata, shi ne rashin managarcin dakin motsa jiki na zamani, mai kunshe da kayan motsa jiki da suka dace da ‘yan wasan dambe.

Koci Tipo ya ce yana gudanar da horas da ‘yan dambe ne kawai bisa sha’awarsa ga wasan, duba da cewa har yanzu, ba shi da wasu masu daukar nauyin aikin da yake yi, kuma suma wadanda yake horaswa ba su da kudin da za su iya biyan sa.

Ya ce "Idan na bukaci su biyani kudin horon da nake ba su, kuma ba su da shi, ke nan sai dai su bar basirar ta su a gida. Kuma wadannan yara kusan ko kudin cin abinci ma ba su da shi."

Koci Adegbite ya ce, akwai bukatar zuba jari mai tarin yawa a wasan boxing, a wannan gaba da ake fatan samar da ci gaba, da makoma mai kyau ga wasan Boxing a Najeriya. 

A yau zan gabatar muku da wani labarin da ya shafi wata masaniyar ilimin noma, wadda ke kokarin tabbatar da tsabtar ruwa a lardin Zhejiang dake gabashin kasar Sin.