Yanayin tattalin arzikin duniya na fuskantar kalubale a farkon shekarar 2016, hakan kuma saurin bunkasuwar tattalin arzikin kasar Sin a shekarar 2015 ya ragu zuwa kashi 6.9 cikin dari, wanda ya kai adadin mafi kasa a cikin shekaru 25 da suka gabata, abinda da ya jawo hankalin kasa da kasa, wadanda suka nuna damuwa sosai ko halin zai kawo mummunan tasiri ga tattalin arzikin duniya. Game da wannan tunani, masanin tattalin arziki na bankin zuba jari na Goldman Sachs ya bayyana a nan birnin Beijing cewa, tattalin arzikin kasar Sin na samun bunkasuwa yadda ya kamata, don haka ba abin damuwa a ciki.

Babban masanin ilmin tattalin arziki mai ba da shawara na wannan banki Mista Jan Hatzius ya bayyana a wani dandalin tattaunar manyan tsare-tsaren kasar Sin da aka yi a wannan rana a nan birnin Beijing cewa, raguwar saurin bunkasuwar tattalin arzikin kasar Sin ba zai kawo mummunan tasiri ga bunkasuwar tattalin arzikin duniya sosai ba, musamman ma ga kasashe masu wadata. A cewarsa, Amurka da kasashe dake yin amfani da kudin Euro ba za su fuskanci hadarin ciniki mai tsanani dangane da kasar Sin ba. A wani hannu na daban, Sin ba ta da alaka mai zurfi da tsarin hada-hadar kudi na kasashen Turai da Amurka. A don haka, raguwar saurin bunkasuwar tattalin arzikin kasar Sin ba zai kawo mummunan tasiri ga bunkasuwar tattalin arziki ba a fannin ciniki da hada-hadar kudi.

Game da saurin bunkasuwar tattalin arziki a shekarar bana da badi kuma, Goldman Sachs ya yi kiyasin cewa, adadin zai kai 6.9% a bana kuma 6.3% a badi, adadin da ya bayyana karfin samun bunkasuwar tattalin arziki cikin sauri. (Amina)