Babban direktan bankin HSBC Mista Stuart Gulliver ya yi jawabi a gun wani taron da aka yi a ran 16 ga wata a birnin London cewa, bai kamata a nuna damuwa kan tattalin arzikin kasar Sin ba. Sauye-sauye da aka yi a cikin kasuwanni ba zai kawo cikas ga bunkasuwar tattalin arzikin kasar Sin ba, kuma gwamnatin kasar Sin ba za ta dauki wani tsattsauran mataki na tsuke bakin aljihu ba.

Ban da wannan kuma, Mista Stuart Gulliver ya ce, Sinawa na nuna karfi sosai wajen saye da sayarwa, kasuwar gidaje kuma na samun farfadowa bisa zagayowar lokaci, kuma an samu kyautatuwa a fannin manyan ababen more rayuwa, basussuka, hada-hadar kudi da sauransu. Dadin dadawa, tsarin da babban bankin kasar Sin ke dauka na canja tsai da darajar kudin Sin ya kasance wani babban mataki ne dake cikin kwaskwarima da Sin take yi, ba kamar jita-jita da aka yi ba wai da zummar rage darajar kudi ko sa kaimi ga sana'ar fitar da kayayyaki zuwa kasashen waje ba. A cikin watanni da suka gabata, a cewar Mista Stuart Gulliver, sauyawar harkokin darajar kudi da kasuwannin hanayen jari cikin watannin da suka gabata ba za su kawo illa ga bunkasuwar tattalin arziki cikin dogon lokaci ba. Bunkasuwar tattalin arziki da birane a kasar Sin zai samar da sabbin kasuwanni, kuma saurin bunkasuwar tattalin arzikin Sin zai haura bisa na bunkasuwar da duniya za ta samu. (Amina)