Rundunar 'yan sanda a tarayyar Najeriya, ta ce jami'anta sun samu nasarar dakile wani yunkuri na fasa gidan yarin Afokang dake birnin Calaban jihar Cross River.
A cewar kwamishinan 'yan sandan jihar Horgan Bassey, wasu mahara da ba a tantance ko su waye ba ne suka farma gidan yarin na Afokang, sai da a cewar sa hakar su bata cimma ruwa ba. Bassey ya ce jami'an tsaro sun samu nasarar dakile yunkurin fasa gidan yarin.
Kwamishinan 'yan sandan ya kuma tabbatar da cewa ba a samu asarar rayuka yayin dauki ba dadin da jami'an tsaro suka yi da maharan ba, kana ya ce za a gudanar da bincike game da aukuwar lamarin.