Babban magatakardar MDD Antonio Guterres, ya yi na’am da yarjejeniyar cimma daidaito, tsakanin sojojin gwamnatin kasar Sudan da ‘yan siyasar kasar.

Cikin wata sanarwa da ofishin sa ya fitar a jiya Litinin, Mr. Guterres ya yi fatan yarjejeniyar za ta share fagen mika mulki ga zababbiyar gwamnatin farar hula a kasar. Ya kuma yi kira ga daukacin masu ruwa da tsaki a harkokin siyasar Sudan, da su yi aiki tukuru wajen ganin an warware muhimman batutuwan siyasar kasar, domin kaiwa ga cimma matsaya mai dorewa a siyasance, wadda dukkanin sassa za su aminta da ita.

Guterres ya kara da cewa, MDD da hadin gwiwar tawagar dake fafutukar tallafawa mika mulki ga farar hula a Sudan, da kungiyar IGAD, suna kara himmatuwa, wajen ganin sun tallafawa nasarar wannan muhimmin aiki.    (Saminu Alhassan)