Za a shirya “Bikin sayar da kaya masu alamomi da inganci ta yanar gizo karo na hudu, kuma bikin sayar da kaya masu kyau na Afirka” a tsakanin ranakun 28 ga watan Aflilu zuwa ranar 12 ga watan Mayu. Bisa kididdigar da aka yi, shagunan sayar da kayayyaki ta Intanet fiye da 300 za su halarci bikin, kuma za a samu halartar samfurori sama da 100,000, da 'yan kasuwa fiye da miliyan daya. Ana sa ran masu sayayya za su dandana kofi na Habasha, da miyar yaji ta Ruwanda, da ganyen shayin Kenya, da dai sauransu ta hanyar watsa shirye-shirye kai tsaye da jakadan su ke yi ta yanar gizo.

A cikin 'yan shekarun nan, sabon tsarin kasuwanci kamar sayayya ta yanar gizo yana habaka a Afirka, kamfanoni da daidaikun jama'a na Afirka suna fatan koyon fasahohin da kasar Sin ta samu a fannin bunkasuwar fasahar zamani, da karfafa hakikanin hadin gwiwarsu da kasar. Zhou Ping, mataimakin shugaban sashen kula da harkokin Afirka na ma'aikatar harkokin wajen kasar Sin, ya ba da wasu alkaluma. Ya ce, a shekarar 2021, yawan kudin da aka samu na cinikayya a tsakanin Sin da Afirka ya karu duk da yanayin da ake ciki na tinkarar annobar COVID-19, inda ya karu da kashi 35.3%, wanda ya kai matsayin da ba a taba samu ba a tarihi. Daga cikinsu, shigo da kayayyaki daga Afirka ya karu da kashi 43.7%.

Zhou ya kara bayyana cewa, "Kasar Sin ba ta taba neman rarar ciniki a yayin cinikayyarta da Afirka ba. Bisa aiwatar da matakai kamar su samar da sauki wajen shigo da kayayyakin amfanin gona na Afirka, da fadada fanonnin da ba za a biya harajin kwastan ba, da bukukuwan sayayya ta yanar gizo da dai sauransu, za a sa kaimi da fadada shigo da kayayyakin Afirka a kasar ta Sin, da ciyar da cinikayya a tsakanin Sin da Afirka gaba cikin daidaito kuma mai inganci. A sa'i daya kuma, kayayyaki masu inganci na Afirka su ma za su bayar da zabi iri daban-daban ga masu sayayya na kasar Sin. Na yi imanin cewa, ko shakka babu, bikin sayar da kayayyaki masu kyau na Afirka ta Intanet na bana zai kasance mai ban mamaki, wanda zai ba da muhimmiyar gudummawa wajen inganta hadin gwiwar Sin da Afirka zuwa wani sabon matsayi.” (Mai fassara: Bilkisu Xin)