Ban da wannan kuma, a nan kasar Sin, wani tsohon mai horas da 'yan wasan kwallon kafa Zeng Xuelin ya kwanta dama a ranar 11 ga watan Fabrairun wannan shekara. Ana iya tunawa da tsohon dan wasan kwallon kafan ne bisa irin salon shugabancinsa, a loakcin da ya jagoranci babbar tawagar kwallon kafan kasar a wasannin cin kofin nahiyar Asiya a shekarar 1984.

Haka zalika, a lokacin da tawagar 'yan wasan kwallon kafan ta Sin ta kwashi kashinta a hannun takwararta ta yankin Hong Kong, a wasansu a shekarar 1985, lamarin ya haifar da rashin baiwa kasar damar shiga gasar cin kofin duniya a shekarar 1986, batun da ya bakantawa hukumar wasannin kasar Sin rai, hakan ya sa daga bisani marigayi Zeng yayi murabus daga mukaminsa.