Ministan harkokin waje na kasar Sin Wang Yi ya yi bayani dangane da tattalin arzikin kasar Sin a lokacin taron dandanlin tattalin arziki na DAVOS na shekarar 2014 a ran Juma'a ranar 24 ga wata, inda a jawabin da ya gabatar mai taken "Sabon zarafi ga duniya." Ya ce, kwaskwarimar da Sin za ta yi a sabon zagaye za ta kawo sabon zarafi ga duniya, wanda kuma ya sa kasar Sin ta shiga wani sabon karni wajen samun bunkasuwa. Mr Wang ya kara da cewa, matakin zai samarwa duk duniya amfani mai yakini wanda hakan ya sa, Sin ke da kwarin gwiwa sosai ga ci gaban da za a samu wajen yin kwaskwarima.

Bugu da kari, Sin wadda ta zurfafa yin kwaskwarima da samun wadata za ta samarwa duniya zarafi a bangarorin daban-daban, ciki hadda kasuwanni, zuba jari, samun bunkasuwa da hadin kai. Ban da haka, inji shi, kasar za ta ba da gudumawarta ga zaman lafiyar duniya. Ministan harkokin wajen na kasar Sin har ila yau ya bayyana cewa, Sin za ta nace ga hanyar samun bunkasuwa cikin lumana, a sa'i daya kuma za ta ci gaba da sa kaimi ga kasa da kasa na ganin sun bi hanyar samun bunkasuwa cikin lumana, tare kuma da daukar karin nauyin kasa da kasa, har da kokarin shiga tsakanin wasu manyan matsalolin da suke fi jawo hankali, sannan kuma zata ci gaba da warware rikici da bambancin ra'ayi ta hanyar sulhuntawa cikin daidaici, gami da kiyaye mutuncin bil Adam da doka da daidaituwar kasa da kasa.

Shugaban kasar Sin Xi Jinping ya gabatar da burin da Sin za ta cimma na farfado da al'ummarsu mai jigon "mafarin kasar Sin", in ji shi, kwaskwarimar da Sin za ta yi a sabon zagaye za ta taimaka ga cimma wannan buri. (Amina)