An yi shawarwari karo na biyar dangane da tsare-tsare da tattalin arziki tsakanin Sin da Amurka a birnin Washington daga ran 10 zuwa 11. Sin ta yi shawarwari da kasar Amurka kan tsarin zuba jari bisa wasu manufofin gatanci. Kakakin ma'aikatar kasuwanci ta kasar Sin Shen Danyang ya ba da jawabi a ran 12 ga wata kan wannan batu cewa, tsarin da ake bi wajen yin shawarwari ya dace da halin da ake ciki, dangane da raya kasashen duniya gaba daya.

Yana mai cewa, wannan tsari ya dace da garanbawul da Sin take yi a fannin tsarin sa ido da zartaswa, kuma hakan zai kawo amfani wajen samarwa kamfanoni wani yanayi mai adalci na yin takara tare, da kuma kara karfin kasuwanni ta yadda za a sa kaimi ga bunkasuwar tattalin arzikin kasar.

Shen Danyang ya ce, yanzu akwai makoma mai kyau wajen raya dangantakar hadin gwiwa a fannin ciniki da tattalin arziki tsakannin kasashen Sin da Amurka, kuma yawan jarin da suke zubawa juna ya rika karuwa a fannoni daban-daban. Bangarorin biyu za su cimma moriyarsu yadda ya kamata muddin suka kai ga daddale wata yarjejeniyar kawo moriyar juna a fannin zuba jari. Sin na fatan hadin gwiwa da kasar Amurka don ciyar da shawarwarin gaba. (Amina)