Kwanan baya, jakadan Sin da ke Amurka Cui Tiankai, ya yi suka ga kalaman ministan tsaro na kasar Amurka Chuck Hagel, sakamakon zancen da ya yi dangane da tsibirin Diaoyu na kasar Sin, wanda bai dace da hakikanin halin da ake ciki ba, kana ya lallashe Amurka da kada ta haddasa yanayin da nan gaba, zai sa reshe ya juye da mujiya. Domin mayar da martani game da wannan zance, a ranar 1 ga wata, ma'aikatar kula da harkokin wajen kasar Amurka ta bayyana cewa, batun magance daukar matakan da za su kawo halin kunci ya shafi bangarorin biyu, kuma Amurka ba ta da dalilin tsoma baki game da mulkin kai na tsibirin Diaoyu.

A ranar 29 ga watan Afrilu, a gun taron manema labaru na ministocin tsaron kasashen Amurka da Japan cikin hadin gwiwa, Hagel ya bayyana cewa, Amurka na nuna adawa ga daukar matakin da za su lahanta hakkin mallakar tsibirin Diaoyu na Japan, kuma ya ce, yayin da babban hafsa-hafsoshi na Amurka Martin E. Dempsey, ke ziyara a birnin Beijing da ke kasar Sin, shi ma ya bayyana irin wannan ra'ayi. Game da wannan, a ranar 30 ga wata, Cui Tiankai ya mayar da martani, inda ya bayyana cewa, zancen da Hagel ya yi, don gane da ziyarar Dempsey da shawarwarin da ke tsakaninsa da kasar Sin bai dace da halin da ake ciki ba, a wancan lokaci, Sin ta bayyana matsayin da take kai game da batun tsibirin na Diaoyu, kuma Amurka ma, ta fahimci ra'ayin kasar Sin.(Bako)