Mataimakin hafsan hafsoshin sojojin kasar Sin Qi Jianguo da mataimakin ministan tsaron kasar Amurka James Miller sune suka jagoranci zaman shawarwari karo na 13 kan tsaron kasa a tsakanin kasar Sin da Amurka a birnin Washinton dake kasar Amurka a ranar 12 ga wata inda Qi Jianguo ya bayyana matsayin kasar Sin kan batutuwan Taiwan, tsibirin Diaoyu da kuma tekun kudu. Bangarorin biyu sun amince da kara yin hadin gwiwa don tabbatar da zaman lafiya a yankin Asiya da tekun Pasific.

Bisa labarin da aka bayar a kan shafin internet na ma'aikatar tsaron kasar Sin, an ce, Qi Jianguo ya jaddada a gun shawarwarin cewa, gwamnatin kasar Sin ta tsaya tsayin daka kan tabbatar da ikon mallakar kasar, cikakken yancin kasar da kuma moriyar kasar a kan teku.

Ban da wadannan kuma, bangarorin biyu sun yi musayar ra'ayoyi kan dangantakar sojojinsu, tsaron aikin soja a kan teku, zaman lafiyar kasashen duniya da yankuna da dai sauransu, musamman ma sun yi tattaunawa sosai kuma sun cimma matsaya daya a fannoni da dama kan yadda za a aiwatar da ayyuka da shugabannin kasashen biyu suka tsara, na inganta dangantakar sojojinsu da aikin sojansu a cikin yanayi da ake yanzu. (Zainab)