Ministan harkokin waje na kasar Birtaniya William Hague ya nuna a ran 9 ga wata cewa, a yayin taron ministocin harkokin waje na kasashen kungiyar G8 da za a bude ranar yau Laraba 10 ga wata, za a fi tattaunawa kan yadda za a magance rikice-rikice, tare kuma da daidaita matsayin da kasashen takwas suke dauka kan wasu manyan batutuwa dake jawo hankalin kasa da kasa, ta yadda za su dauki matakai na bai daya.
William Hague ya ce, taron zai fi mai da hankali kan wasu manyan batutuwa ciki hadda rikicin kasar Sham, batun nukiliyar kasar Iran, shimfida zaman lafiya a yankin gabas ta tsakiya, halin da zirin Koriya yake ciki da sauransu. Kasashen na fatan taka rawa gwagwadon karfinsu wajen magance wadannan rikice-rikice. (Amina)
