Cibiyar kandagarki da shawo kan cututtuka masu yaduwa ta nahiyar Afirka ko Africa CDC, ta sanar da aniyar yin hadin gwiwa da mambobin kungiyar raya tattalin arzikin duniya ta G20, a fannonin da suka jibanci kiwon lafiya.

Africa CDC, kwararriyar hukumar kiwon lafiya dake karkashin kungiyar tarayyar Afirka AU, ta jinjinawa amincewar da aka yiwa AU, ta zama mambar dindindin a G20.

Wata sanarwar da aka fitar game da hakan, ta ce "Wannan mataki ya fayyace matsayin Afirka, na kasancewa muhimmiyar abokiyar ta lafiya a harkokin duniya, wadda ke cikin shirin ba da gudummawa, da maida hankali ga muhimman batutuwan dake jan hankalin nahiyar, wadda ke matsayin mazauni ga yankin ciniki maras shinge mafi girma a duniya."

Kaza lika, sanarwar ta ce, "bisa nauyin dake wuyanta, kana da matsayinta na babbar cibiyar kiwon lafiya ta Afirka, Africa CDC za ta wakilci kasashen nahiyar a taron ministocin kungiyar G20" dake tafe.

Kungiyar AU dai ta ayyana cibiyar Africa CDC a matsayin wakiliya mai karfi dake wakiltar muryar al’ummun Afirka su biliyan 1.4, wadda a yanzu kuma ke tafiya kafada da kafada da kungiyar tarayyar Turai ta EU, a matsayin kungiya ta biyu, mai wakilcin nahiya, da babban yankin kasashe daban daban, wadda kuma ta yi nasarar zama mambar dindindin a kungiyar G20.  (Saminu Alhassan)