Adadin lantarki da kasar Sin ke samarwa ta makamashin nukiliya, ciki har da wanda ake aiki da shi, da wanda ake kan ginawa, da wanda aka amince da shi a hukumance, ya kai matsayin koli tsakanin kasashen duniya.

A cewar shugaban kungiyar nazarin makamashi ta kasar Sin ko CERS a takaice, mista Shi Yubo, kasar Sin na da kilowatts miliyan 58.08 na lantarki daga nukiliya da ake amfani da shi, da kilowatts miliyan 55.05 da ake kan ginawa a hukumance, wanda hakan ya sanya kasar zama na daya a duniya a wannan fanni.

Shi Yubo, ya bayyana hakan ne yayin taron karawa juna sani karo na 3, game da bunkasar ingancin makamashin nukiliyar kasar Sin, wanda ya gudana a birnin Shenzhen, na lardin Guangdong dake kudancin kasar Sin, tsakanin ranakun Litinin zuwa Larabar nan.

Shi ya kara da cewa, abu ne mai muhimmanci a mayar da hankali sosai ga ingiza sabon karsashi, a fannin samarwa da bunkasa ingancin sashen makamashin nukiliyar kasar Sin zuwa matsayin koli. (Saminu Alhassan)