A jiya Juma’a ne kungiyar Hamas ta tabbatar da mutuwar shugabanta Yahya Sinwar, ba tare da bayar da cikakken bayani kan yadda Sinwar ya mutu ko wanda zai gaje shi ba.

A cikin wata sanarwar da ta fitar, kungiyar ta Hamas ta ce, ba za ta saki wadanda ake tsare da su a zirin Gaza ba, sai idan an daina kai hare-hare a zirin na Gaza, da janyewar dakarun Isra’ila daga gare ta, da kuma sako jarumai Falasdinawa da ake tsare da su a fursunonin yankin da aka mamaye.

Hakazalika, kungiyar Al-Qassam Brigades, reshen kungiyar Hamas mai dauke da makamai, a cikin wata sanarwa da ta fitar ta ce, za a ci gaba da yin gwagwarmaya har sai an cimma ingantattun manufofin mutanenmu.

Har ila yau, a ranar Juma'ar, Khalil Al-Hayya, mataimakin shugaban kungiyar Hamas a Gaza, ya yi jimamin mutuwar Sinwar a wani jawabi da ya yi ta gidan talabijin.