Akalla mutane 90 ne suka mutu, yayin da wasu 50 kuma suka samu raunuka daban daban, bayan da wata tankar mai ta fashe a jihar Jigawa da ke arewacin Najeriya da yammacin ranar Talata, kamar yadda rundunar ‘yan sandan kasar ta bayyana a yau Laraba.

Kakakin rundunar ‘yan sanda jihar Jigawa Shi'isu Lawan Adam, ya shaidawa kamfanin dillancin labarai na Xinhua ta wayar tarho cewa, wadanda lamarin ya rutsa da su, galibinsu mutane ne da suka garzaya domin dibar mai, bayan da tankar ta kwace ta kuma kife a garin Maliya da ke karamar hukumar Taura.

Ya kara da cewa, an kai wadanda suka jikkata zuwa asibitin gwamnati domin yi musu magani, yayin da aka shirya jana’izar marigayan da safiyar yau Laraba. (Yahaya)