Kakakin kwamitin tsaron kasar Amurka, John Kirby, ya ce Amurka tana ganin Iran “ta riga ta shirya ayyukan ramuwar gayya ga Isra’ila”, don haka a halin yanzu Amurka ta girke karin sojoji a yankin gabas ta tsakiya.

John Kirby ya bayyana hakan ne a jiya, inda ya ce, Amurka ta dauki matakin ne don gargadi Iran da kada ta kai harin ramuwar gayya ga Isra’ila, domin bai kamata a ta’azzara rikicin ko tayar da yaki a yankin ba. Amma idan Iran ta kai hari ga Isra’ila, to, Amurka ta riga ta shirya wajen kare Isra’ila, in ji jami’in kasar Amurka.(Safiyah Ma)