Babban magatakardar MDD Antonio Guterres, ya yi kira ga dakarun Houthi na Yemen, da su gaggauta sakin jami’an MDD, da sauran mutanen da suka yi garkuwa da su ba tare da gindaya wani sharadi ba.

Cikin wata sanarwa da kakakinsa Stephane Dujarric ya fitar a jiya Litinin, mista Guterres ya bayyana matukar damuwa, game da yanayin da jami’an majalissar, da mambobin kungiyoyin al’umma, da jami’an kungiyoyi masu zaman kan su, da na ofisoshin diflomasiyya, da sassa masu zaman kan su ke ciki tsawon sama watanni 2 a hannun dakarun na Houthi.

Dujarric, ya ce babban magatakardar MDD ya yi Allah wadai da kutsen baya bayan nan da dakarun Houthi suka yi cikin harabar ofishin babban kwamishinan MDD mai lura da kare hakkokin bil adama dake Sanaa, yana mai kira gare su da su mika ikon ofishin ga babban jami’in tsare tsare na ofishin dake kasar Yemen nan take. (Saminu Alhassan)