Kungiyar gwagwarmayar Islama ta Hamas ta fada jiya Laraba cewa ta tuntubi masu shiga tsakani na Qatar da Masar domin kawo karshen yakin da Isra’ila ke yi a zirin Gaza.

A daya bangaren ma, firaministan Isra’ila Benjamin Netanyahu ya bayyana a cikin wata sanarwa cewa Isra’ila ta samu martanin Hamas daga masu shiga tsakani.

Ya tabbatar da cewa Isra’ila za ta yi nazari kan martanin Hamas kuma za ta mayar da martani.

Kafar yada labaran Isra’ila ya rawaito cewa wannan shi ne mafi kyawun martani da aka bayar ya zuwa yanzu, yana mai cewa akwai tushen samun maslaha a martanin.

A kwanakin baya ne dai kungiyar Hamas ta bayyana cewa ta samu wani sabon tayi daga Amurka na ci gaba da tattaunawar ta hanyar shiga tsakani da Isra'ila domin cimma yarjejeniyar tsagaita bude wuta. (Yahaya)