Rundunar sojojin Syria ta sanar da sanyin safiyar yau Alhamis cewa, Isra’ila ta kai hare-hare ta sama kan yankin kudancin kasar da daren jiya Laraba, wadanda suka haddasa mutuwar mutane biyu da raunatar mutum daya.

Sanarwar ta bayyana cewa, da misalin karfe 11: 40 na dare a jiya Laraba agogon wurin, Isra’ila ta kai hare-hare ta sama a wasu wurare dake kudancin Syria, daga yankin tuddan Golan da ta mamaye, inda tsarin tsaron sama na Syria ya kakkabo wasu makamai masu linzami da aka harba. 

Ban da hakan, rahoton da kafar watsa labarai ta Syria, Sham FM ta bayar, da daren jiya Laraba, ya ce Isra’ila ta kai hare-hare yankin Sayyidah Zainabeh dake kudancin karkarar Damascus, fadar mulkin Syria, kuma gine-gine guda biyu sun rushe gaba daya sanadin hare-haren.(Safiyah Ma)