Firaministan Isra’ila Benjamin Netanyahu ya ce ana gab da kawo karshen yaki mai tsanani da Isra’ila ke yi kan Hamas.

Yayin wata hira da tashar 14 TV news ta Isra’ila a jiya Lahadi, Netanyahu ya ce an kusa kawo karshen kazamin yakin da ake yi a Rafah, kuma dakarun Isra’ila na gab da kawo karshen mataki mai tsanani na yaki a zirin Gaza baki daya.

Sai dai ya ce, wannan ba ya nufin kawo karshen yakin da ake yi a zirin Gaza, yana mai cewa za a ci gaba da kai farmaki kan kungiyar Hamas.

Bayan kammala matakin yakin mai tsanani a Gaza, za a ci gaba da kara kutsawa yankin arewaci, wanda ke zaman gargadin Isra’ila na kaddamar da cikakken yaki kan kungiyar Hezbollah ta Lebanon. (Fa’iza Mustapha)