Firaministan kasar Pakistan Muhammad Shahbaz Sharif, ya sake jaddada matsayin kasarsa na nacewa ga ka’idar nan ta “kasar Sin daya tak a duniya”.

Muhammad Shahbaz Sharif ya bayyana hakan ne cikin wata sanarwa ta kafar sada zumunta a jiya Lahadi, inda ya ce a matsayinta na ’yar uwa ga kasar Sin, wadda kuma ke da huldar abokantaka bisa manyan tsare-tsare tare da Sin, Pakistan ta dade tana goyon bayan duk wani mataki da gwamnatin Sin ke dauka na dunkulewar kasar.

Shugaban kasar Pakistan Asif Ali Zardari ya shaidawa manema labarai na kasar Sin kwanan baya cewa, Pakistan na nacewa wannan ka’ida ba tare da tangarda ba, kuma tana kiyayewa, da ma goyon bayan muradu daga tushe na Sin, tana kuma adawa da duk wani mataki da za a dauka na neman ware yankin Taiwan daga kasar Sin, domin yankin ya kasance wani sashi na yankunan kasar Sin. (Amina Xu)