Kamfanin Airbus mai kera jiragen sama, ya sanar da tura wani ayarin kwararru da za su taimakawa hukumomi binciken musabbabin hatsarin da ya rutsa da daya daga cikin jiragensa samfurin A-350 da ya sayarwa Japan.

Kafar yada labarai ta NHK ta kasar Japan, ta ruwaito a jiya cewa, an tabbatar da mutuwar 5 daga cikin mutane 6 dake cikin jirgin sama na tsaron ruwan Japan da ya yi taho-mu-gama da wani jirgin fasinja a filin jirgin saman Haneda na Tokyo a jiya Talata.

A daya bangaren kuma, dukkan fasinjoji 367 da ma’aikatan jirgi 12 dake cikin jirgin fasinja na Japan, sun tsira da rayukansu yayin da jirgin ya kama da wuta bayan taho-mu-gamar da ya yi da wancan karamin jirgin tsaron ruwan kasar. (Fa’iza Mustapha)