Shugaban Iran Ebrahim Raisi ya bayyana cewa, kungiyar hadin gwiwa ta Shanghai (SCO) da tsarin BRICS suna ba da gudummawa wajen tinkarar tsarin yin babakere da nuna son kai a duniya.

Shugaban ya bayyana hakan ne jiya Alhamis, a yayin wata ganawa da ya yi da wasu malamai da masana mashabar Sunna a Tehran, babban birnin kasar Iran, kamar yadda wata sanarwar da aka wallafa a shafin yanar gizon fadar shugaban kasar ta bayyana.

Raisi ya ce, a halin yanzu, yayin da manyan kasashen duniya suka fuskanci koma baya, musamman Amurka, yanayin duniya yana sauyawa.

Ya kara da cewa, kungiyar SCO da tsarin BRICS, dukkansu tsare-tsare ne dake da nufin tinkarar matakan dannayi da nuna son kai. 

A ranar 24 ga watan Agusta ne, aka gayyaci kasashen Iran da Argentina, da Masar, da Habasha,da Saudiyya, da Hadaddiyar Daular Larabawa a hukumance, don shiga kungiyar BRICS, kungiyar kasashen da tattalin arzikinsu ke saurin bunkasa da suka hada da kasashen Brazil, da Rasha, da Indiya, da Sin, da Afirka ta Kudu.

A farkon watan Yuli, Iran ta zama cikakkiyar mamba a kungiyar SCO a yayin taron kungiyar majalisar shugabannin kasashen kungiyar karo na 23. (Ibrahim Yaya)