Wani bincike da jami’ar Northwestern ta kasar Amurka ta yi ya nuna cewa, kasa da kashi 1 cikin 10 na mata masu juna biyu suna da lafiyar zuciya da jijiyoyin jini masu kyau, sai dai ba safai suke samun abinci mai kyau da ma motsa jiki ba.

An gudanar da binciken ne ta hanyar amfani da alkaluman binciken kiwon lafiya da abinci na kasar Amurka (NHANES) daga shekarar 1999 zuwa ta 2014 ga masu juna biyu 1117 da mata 8200 marasa ciki masu shekaru 20 zuwa 44 da haihuwa.

A yayin gudanar da wannan bincike, an auna lafiyar zuciyarsu da hanyar abincin da suke ci, da yanayin motsa jiki, da rashin shan taba, da yawan adadin nauyin jiki, da bugun jini, da yawan sinadarin glocuse dake cikin jini.

Binciken ya gano cewa, kashi 4.6 cikin 100 na mata masu juna biyun suna da lafiyar zuciya da jijiyoyin jini masu kyau, kana kashi 60.6 cikin 100 daga cikinsu na da matsakaicin lafiyar zuciya, sannan kashi 34.8 cikin 100 na da karancin lafiyar zuciya.

Haka kuma, binciken ya gano matakan lafiyar zuciya da jijiyoyin jini sun fi muni a cikin kananan mata masu juna biyun, masu shekaru 20 zuwa 24 da haihuwa, idan aka kwatanta da masu shekaru 35 zuwa 44, ko kuma bakaken fata wadanda ba ‘yan asalin Latin Amurka ba sun fi karancin lafiyar zuciya, idan aka kwatanta da fararen fata wadanda ba ‘yan asalin Latin Amurka ba ko ‘yan asalin Latin Amurka.

Mataimakiyar farfesa a fannin ilimin kananan yara da rigakafi a makarantar aikin likita ta NU Feinberg Amanda Marma Perak, ta ce ya kamata mata masu juna biyu su yi aiki tare da likitocinsu na farko ko likitan mata masu juna biyu ko likitan mata, ko dukka biyun, don inganta matakan kula da lafiyar zuciya kafin, lokacin da kuma bayan daukar ciki." "Wannan yana nufin samun ingantaccen abinci mai gina jiki, da yanayin motsa jiki, da guje wa shan taba, da samun nauyin jiki mai dacewa, da mafi kyawun matakan bugun jini, da kitse da sukari dake cikin jini."

Perak ta kara da cewa, ba safai musamman ma mata masu juna biyu ke samun abincin da ya dace da yadda suke motsa jiki ba, don haka wadannan dabi'u biyu su ne muhimman abubuwa da suka dace a fara yi.

A kwanakin baya ne, aka wallafa wannan bincike a mujallar kungiyar masu kula da lafiyar zuciya ta Amurka da ake kira, Journal of the American Heart Association.