Hukumar bayar da agajin gaggawa ta Najeriya, (NEMA) ta bayyana cewa, mutane 662 ne suka mutu, yayin da wasu sama da miliyan 2.4 suka rasa matsugunansu sakamakon ambaliyar ruwa a sassa daban-daban na kasar a shekarar 2022.

Babban darektan hukumar Mustapha Habib Ahmed ne ya bayyana hakan jiya Litinin, a yayin wani taron horar da dabarun tunkarar bala’o’i da aka gudanar a Abuja, babban birnin kasar, Ahmed ya bayyana bala’in ambaliyar ruwa na shekarar 2022, a matsayin wanda ba a taba ganin irinsa ba a tarihin Najeriya.

A nasa jawabin, daraktan kula da ma’aikatan hukumar NEMA, Musa Zakari, ya bayyana cewa, yadda sauyin yanayi ke canjawa cikin sauri, ya haifar da yawaitar bala’o’i a fadin kasar nan. Yana mai cewa, manufar horon, ita ce baiwa jami’an hukumar ta NEMA karin ilimi kan yadda za a magance bala’o’i.(Ibrahim)