Shugaban Nijeriya Muhammadu Buhari, ya ce tattalin arzikin kasar na ci gaba da nuna juriya, kuma yana samun tagomashi, duk da kalubalen da yake fuskanta.

Shugaban ya bayyana haka ne a jiya, yayin kaddamar da kwamitin shugaban kasa kan raya tattalin arzikin a birnin Abuja, fadar mulkin kasar, inda ya ce asarar man fetur mai yawa wanda shi ne kashin bayan tattalin arzikin kasar, da annobar COVID-19 da rikicin Rasha da Ukraine, sun haifar da mummunan tasiri kan tattalin arzikin kasar mafi yawan al’umma a Afrika.

Ya ce yayin da tattalin arzikin duniya ke fuskantar kalubale da dama da ya hada da matakan kulle saboda annobar COVID-19 da tsaikon samar da kayayyaki da hauhawar farashinsu a duniya, tattalin arzikin Nijeriya na ci gaba da nuna juriya da samun tagomashi, duk tasirin karuwar kudin musayar dala da na kudin ruwa a fadin duniya.

Shugaban ya kuma bukaci kwamitin da ya yi tunani mai zurfi domin shawo kan matsalolin da ake fuskanta a Nijeriya. (Fa’iza Mustapha)