Kakakin gwamnatin kasar Burkinafaso Lionel Bilgo, ya bayyana jiya Litinin cewa, akalla fararen hula 50 sun rasa rayukansu sakamakon harin da ‘yan bindiga suka kai yankin Sahel dake arewacin kasar a daren ranar 11 ga wata.

Bilgo ya kara da cewa, dakarun da ba a san ko su wane ne ba, sun kai hari garin Seytenga na jihar Seno dake yankin Sahel a daren ranar 11 ga wata, inda zuwa yammacin jiya Litinin, aka samu akalla fararen hula 50 da suka rasu, yana mai cewa akwai yiwuwar adadin zai karu a nan gaba, kana harin ya sa mazauna da dama tserewa daga garin. (Jamila)