A yau Laraba 13 ga wata ne kamfanin kera layin dogo na Sin, daya daga cikin manyan kamfanonin kera layin dogon na kasar Sin ya kammala aikin gina layin dogo na Benguela dake kasar Angola inda ake sa ran zai fara aiki a wannan shekara. Wannan shi ne layin dogo mafi tsawo da kasar Sin ta gina a ketare bayan layin dogo da ya hade Tanzania-Zambia da Sin ta ba da taimako wajen ginawa a shekarun 1970.

Layin dogo na Benguela mai tsawon kilomita 1344 ya tashi ne daga birnin Lobito mai tashar jiragen ruwa dake kusa da tekun Atilantika, har zuwa birnin Luau dake iyaka da kasar Congo-Kinshasa, kana muhimmiyar hanyar kasuwanci ga Lobito na kasar Angola.

Wasu masana na ganin cewa, layin dogon Benguela zai taimaka matuka ga kasashen Congo-Kinshasa, Zambia da sauransu wajen rage kudin da za su kashe kan fitar da ma'adinai. A sa'i daya kuma, bayan hade wannan layin dogon da layoyin dogo na kasashen Zimbia, Congo-Kinshasa, Mozambique da dai sauran kasashen dake kewayensa, zai taimaka matuka wajen bunkasa tattalin arzikin yankin, tare da kafa wani babban layin dogo dake tsakanin tekun Atilantika da tekun India. (Maryam)