A yau Litinin ne, shugaba Muhammadu Buhari na Najeriya ya yi wa al'ummar kasar jawabinsa na farko tun bayan da ya dawo daga dogon hutun jinyar da yake a birnin Landan a ranar Asabar din da ta gabata, yana mai cewa, batun hadin kan kasa, batu ne da aka riga aka cimma matsaya a kai kuma ba za a sake waiwayarsa ba.

Shugaba Buhari ya kuma yi Allah wadai da kalaman baya-bayan da wasu ke yi, musamman a shafukan sada zumunta game da makomar hadin kan kasar.

Don haka ya yi kira ga 'yan Najeriya, ba tare bambamcin kabila ko addini ba, da su guji duk wasu abubuwan da za su raba kan kasar, maimakon haka su mayar da hankali wajen tunkarar kalubalen tattalin arziki, tsaro, siyasa da kasar take fuskanta, su kuma hada kai tare da tabbatar da zaman lafiya da sauransu.(Ibrahim)