Mahukuntan Najeriya sun bayyana kudurinsu na rage kudaden da ake kashewa wajen aikin hako mai daga dala 32 kan kowace ganga zuwa dala 15 kan kowace ganganr mai, ta yadda hakan zai rage kudaden da masu zuba jari daga ketare ke kashewa.

Ministan albarkatun mai na Najeriya Ibe Kachikuwu wanda ya bayyana hakan a birnin Legas, cibiyar kasuwancin kasar, ya ce kudaden da ake kashewa suna kara harkar zuba jari kai tsaya ta kara tsada.

Ministan ya ce an tsara dokar tafiyar da masana'antar man kasar (PIGB) da nufin inganta bangaren samar da man kasar ta yadda hakan zai iya janyo masu sha'awar zuba jari.

Kachikwu ya ce batutuwan tsaro da karancin kudi da matatun man kasar ke fuskanta, sun taimaka wajen jinkirta fara aikin matatun man kasar, ko da an bayar da lasisi. (Ibrahim Yaya)