Jiya Asabar 15 ga wata, rundunar sojan kasar Iraq ta fidda wata sanarwa, inda ta bayyana cewa, jiragen saman soja na kasar Syria sun kadaddmar da hare hare da dama a ofisoshin gudanarwa na kungiyar IS, kuma sun hallaka dakarun kungiyar da dama, sakamakon matakan soja da ta dauka tare da rundunar sojan kasar Syria domin yaki da kungiyar IS dake cikin kasar ta Syria.

Kuma wannan shi ne karo na farko da bangarorin biyu suka hada kai wajen yaki da kungiyar IS, bayan sojojin sama na kasar Iraq sun kai hari kan dakarun kungiyar mai tsattsauran ra'ayin dake kasar Syria a watan Fabrairun bana.

Bugu da kari, cikin sanarwar da ofishin ba da jagoranci kan ayyukan hadin gwiwar ya bayar, an ce, a wannan karo, an kai hari kan kungiyar IS ta hanyar amfani da tsarin musayar bayanai dake tsakanin kasashe hudu da suka hada da Rasha, Syria, Iraq da kuma Iran.

A watan Satumba na shekarar 2015, bisa jagorancin kasar Rasha, kasashen hudu suka kafa wata cibiyar musayar bayanai a birnin Baghdad na kasar Iraq, inda za su dinga yin musayar bayanai kan harkokin kungiyar ta IS. (Maryam)