Ofishin kula da harkokin jin kai na MDD dake kasar Sudan, ya fidda wani rahoto a ranar 17 ga wata, inda ya ce a halin yanzu, adadin 'yan gudun hijirar kasar Sudan ta Kudu da ke zaune a kasar Sudan, ya kai sama da dubu dari 3, kuma galibinsu sun fito ne daga jihar Bahr El Gazal ta Arewa da kuma jihar Warrap dake kasar Sudan ta Kudu.

Rahoton ya kuma bayyana cewa, kashi 65 cikin dari na 'yan gudun hijirar yara ne, kuma da yawa daga cikinsu suna fama da matsananciyar yunwa.

Dangane da haka ne, hukumar kula da 'yan gudun hijirar ta MDD ta shirya samar musu kayayyakin da suke bukata, ta yadda za a ba su taimako cikin gaggawa.

Har ila yau, rahoton ya bayyana cewa, za a iya samun karin 'yan gudun hijirar Sudan ta Kudu da za su nemi mafaka a kasar Sudan. (Maryam)