Mataimakin shugaban tawagar wakilan kasar Sin a babban taro karo na 22 na kasashen da suka kulla yarjejeniyar sauyin yanayi ta MDD da ake yi a birnin Marrakech na kasar Morocco, kana manzon musamman game da shawarwari kan harkokin sauyin yanayi na ma'aikatar harkokin wajen kasar Sin Gou Haibo ya bayyana cewa, ya kamata a bi ka'idoji guda uku a yayin da ake gudanar da taron birnin Marrakech.

Wadannan ka'idoji uku sun hada da, na farko, ya kamata a daidaita ayyukan da ake yi a fannonin magance matsalar sauyin yanayi da neman fasahohin da abin ya shafa da kuma neman taimakon kudade game da wannan aiki da sauransu a yayin da ake aiwatar da yarjejeniyar Paris. Na biyu, bai kamata a yi watsi da ra'ayin da aka cimma ba. Na uku kuma na karshe, ya kamata a fahimtar da kasashe masu tasowa game da wannan aiki, yayin da ake kokarin taimakawa gwamnatocin kasashen duniya yadda za su karfafa wannan aiki. (Maryam)