Yau ranar 7 ga wata, ranar kiwon lafiya ce ta kasa da kasa, haka kuma, a ran 6 ga wata, hukumar kiwon lafiya ta duniya wato WHO ta fidda wani rahoto game da ciwon suga a karo na farko, inda ta bayyana cewa, a halin yanzu, mutane sama da miliyan dari hudu suna fama da ciwon suga a duniya, kuma galibi daga cikinsu suna zama a kasashe masu tasowa, kana dalilan da suka haddasa karuwar masu fama da ciwon su ne samun kiba fiye da kima da kuma rashin motsa jiki da dai sauransu.

Haka kuma, a wannan ranar kiwon lafiya, hukumar WHO tana mai da hankali kan fuskantar ciwon suga, kana cikin rahoton da ta fidda a ran 6 ga wata, hukumar ta bayyana cewa, cikin kasashe mafi fama da talauci a duniya, kawai kashi daya bisa uku daga cikinsu suna iya ba da jinya ga wadanda suka kamu da ciwon, shi ya sa, hukumar WHO tana yin kira da a karfafa yin rigakafi da kuma ba da jinya kan ciwon suga, ta hanyoyin kyautata yanayin zaman rayuwa da kuma karfafa kwarewar kasa da kasa kan ayyukan da abin ya shafa, ta yadda za a iya sa kaimi ga al'ummomin kasa da kasa da su kara himmatuwa wajen motsa jiki, kyautata tsarin abincinsu, da taimaka wa wadanda suke fama da ciwon wajen samun jinya da kulawa yadda ya kamata. (Maryam)