Masu lura da ayyukan gini, da shirya filayen wasan da za a yi amfani da su yayin gasar wasannin Olympic na birnin Rio de Janeiro, sun ce ya zuwa yanzu an kammala kaso 95%, na daukacin aikin da ake gudanarwa a "Olympic Park" da "Deodoro Park", yankuna biyu dake kudancin birnin na Rio, inda kuma a nan ne za a gudanar da manyan wasannin na Olympic.

Rahotanni na cewa an gama aiki a wurare 6 cikin wadannan yankuna biyu, wadanda suka hada da filin wasan kwallon hannu, da na goal ball, da babban dandalin watsa labarai, da kuma filin kwallon golf. Sauran su ne filin wasan tseren Babura da na tseren kwale-kwale.

Bisa jimilla, "Olympic Park" zai karbi bakuncin wasannin Olympic 16, da kuma na nakasassu 9. Bangaren wasannin ruwa shi ma a cewar masu lura da aikin ya kusa kammala, yayin da kuma na kwallon tennis ya kai kimanin kaso 90% na kammala.

A yankin Deodoro kuwa, aikin filayen wasan kwallon hockey ya kai ga kaso 99%, yayin da aikin filin "Youth Arena" ya kai kusan kaso 75%. Bisa tsarin aikin, yankin Deodoro zai karbi bakuncin wasannin Olympic 22 da kuma na gasar nakasassu 4.(Saminu Alhassan)