A jiya Jumma'a ne aka kaddamar da taron kolin FOCAC a birnin Johannesburg, inda gwamnatin kasar Sin ta gabatar da bayani na biyu dangane da manufarta kan nahiyar Afirka, inda aka kara tabbatar da cewa, Sin za ta yi kokarin raya dangantakar abokantaka da hadin gwiwa tsakaninta da kasashen Afirka, tare da bayyana sabbin shawarwari da matakan da Sin ke dauka kan nahiyar Afirka a cikin sabon yanayin da ake ciki, domin ba da jagoranci ga mu'amala da hadin gwiwa tsakaninsu a fannoni daban daban a nan gaba.

Bayanin ya bayyana manufa da matakan da Sin ke dauka a fannoni bakwai, wato kara samun fahimtar juna a fannin siyasa, da karfafa hadin gwiwa a fannonin harkokin kasa a kasa, da tattalin arziki da kuma cinikayya tsakanin Sin da kasashen Afirka, da zurfafa mu'amala da hadin gwiwa a fannin al'adun bil'adam, da sa kaimi ga tabbatar da zaman lafiya da tsaro a nahiyar Afirka, da kara yin mu'amala da hadin gwiwa a fannonin diflomasiya da harkokin shari'a da dai sauransu.

A shekarar 2006 ne gwamnatin kasar Sin ta fara fitar da bayanai game da manufofinta kan nahiyar Afirka. A cikin shekaru 10 da suka wuce, an aiwatar da dukkan abubuwa dake kunshe cikin bayani yadda ya kamata, wanda ya taimaka matuka wajen raya dangantaka tsakanin bangarorin biyu a duk kan fannoni.(Fatima)