A jiya ne aka fara taron mata na duniya karo na 11 a birnin Dauville na kasar Faransa, inda za a kashe kwanaki uku ana tattaunawa. Haka kuma, mahalarta taron sama da 1200 wadanda suka fito daga kasashe 73 za su tattauna manyan batutuwan dake shafar zaman takewar al'umma a halin yanzu, bunkasuwar tattalin arziki da dai sauransu. Sannan za su tattauna halin da duniya ke ciki da kuma tsara makomar da ta dace ga mata.
Kaza lika, babbar sakatariyar hukumar kula da ilmi, kimiyya da al'ada ta MDD wato UNESCO Irina Gergieva Bokova da shugabar kasar Mauritius kana masaniya a fannin kimiyyar halittu Ameenah Gurib-Fakim da wasu shugabannin mata a fannoni siyasa, ciniki da kimiyya da fasaha sama da dari daya ne suka halarci taron, tare da yin musayar ra'ayoyi kan yadda za a raya tattalin arziki, tabbatar da zaman daidai wa daida a tsakanin maza da mata da sauran harkoki. (Maryam)
