Jiya Alhamis 30 ga wata, bankin duniya ya sanar da cewa, zai kara samar wa kasashen nan uku dake yammacin Afirka, wato su Guinea, Laberiya da Saliyo, da dallar Amurka miliyan dari daya domin kara azama wajen yaki da cutar Ebola. Ya zuwa yanzu, gaba daya bankin ya samar wa kasashen dallar Amurka miliyan dari biyar.

Cikin sanarwar da bankin duniya ya fidda, an ce, za a yi amfani da wadannan kudade don tallafawa kasashen wajen kafa wata cibiyar hadin gwiwa domin daidaita ayyukan yaki da annobar Ebola tsakanin MDD, hukumar kiwon lafiyar kasa da kasa da kasashen uku da suka fi fama da cutar Ebola, haka kuma za a yi amfani da kudin wajen ba da horas ga masu aikin jinya.

Bisa rahoton da bankin duniya ya bayar, an ce, idan an kasa hana yaduwar cutar daga kasashen Guinea, Liberia da Saliyo zuwa kasashen dake kewayensu, to, ya zuwa karshen shekarar mai zuwa, lamarin zai janyo asara ga tattalin arzikin yammacin nahiyar Afirka wadda za ta kai kimanin dallar Amurka biliyan 32.6. (Maryam)