A jiya Asabar ne wani kakakin kungiyar mayakan sa kai na birnin Misratan kasar Libya, ya zargi kasar Masar da mahukuntan hadaddiyar daular Larabawa ta UAE da kaddamar da wasu hare-hare ta sama kan wasu sansanonin kungiyar a kusa da filin jirgin saman kasar dake birnin Tripoli.

Kaza lika a jiyan ne dai wannan kungiyar mayakan sa kai ta Misrata, ta sanar da kame ikon babban filin jirgin saman kasar dake birnin na Tripoli.

Tun dai a shekarar 2011 bayan kifar da tsohuwar gwamnatin shugaba Gadaffi, kungiyar mayakan Zintan ke rike da ikon filin jirgin saman na birnin Tripoli, kafin sanarwar sauyawar hakan da 'yan Misrata suka fitar, koda yake dai dakarun Zintan ba su tabbatar da gaskiyar hakan ba tukuna. (Maryam)