Bisa labarin da kamfanin dillancin labaru na hadaddiyar daular Larabawa yka bayar a jiya Alhamis 21 ga wata, an ce, hukumar kiwon lafiya ta kasar Abu Dhabi ta sanar da cewa, bayan binciken da aka yi wa wata 'yar kasar Nijeriya da ta rasu a filin jirgin saman kasarta ba zato ba tsammani a makon da ya gabata, an tabbatar da cewa, ba ta kamu da cutar Ebola ba.

Bugu da kari, asitibin jami'ar Emory ta kasar Amurka ya bayyana a ran 21 ga wata cewa, bayan jinya ta makwanni biyu da aka baiwa Amurkawan nan biyu da suka kamu da cutar Ebola a asibitin, ya zuwa yanzu, sun warke. Sa'an nan kuma, cibiyar yin rigakafi da kuma hana yaduwar cututtuka ta kasar ta sanar da cewa, a halin yanzu, babu kwayoyin cutar Ebola a jikinsu, wannan ya sa ba za su kawo barazana ga lafiyar sauran mutane ba, don haka ba za a takaita zirga-zirgarsu ba. (Maryam)