Shugaban kasar Sin Xi Jinping ya gana da sakatariyar hukumar bunkasa ilmi, kimiya da al'adu ta MDD, wato UNESCO Irina Bokova a hedkwatar hukumar dake birnin Paris a ranar Alhamis 27 ga wata.

Yayin ganawarsu, Shugaba Xi Jinping ya bayyana cewa, kasar Sin tana yaba wa matukar a kan ayyukan hukumar UNESCO dangane da raya al'adu na daban daban. Ya ce abin a yaba ne musammam ganin yadda take mai da hankali kan aikin ba da ilmi ga jama'ar kasa da kasa, da ma yadda ta mai da ayyukan da ya shafi daidaiton jinsi da kuma Afirka a matsayi mafi muhimmanci, wanda hakan ya sa ta samu sakamako mai gamsarwa.

Shugaban Xi ya kara da cewa, gwamnatin kasar Sin ta tsai da kudurin kara yawan mutanen da take baiwa guraben karatu a kasashe masu tasowa ta hukumar UNESCO daga guda 25 zuwa 75, don goyon bayan kasashen Afirka wajen raya ayyukan ba da ilmi.

A nata bangaren kuma, Irina Bokova ta nuna godiya ga kasar Sin dangane da goyon baya da kasar ta baiwa hukumarta, ta yi imani cewa, ziyarar shugaba Xi a hukumar za ta ciyar da hadin gwiwar dake tsakanin bangarorin biyu gaba.

Har wa yau shugaban na kasar Sin ya yi jawabi a babban zauren hukumar UNESCO da ke birnin Paris na kasar Faransa, inda ya yi cikakken bayani kan ra'ayinsa dangane da yin mu'amala da yin koyi da juna a tsakanin al'adu daban daban, sannan ya jaddada cewa, ya kamata a kara azama kan tabbatar da girmama juna da yin zaman tare cikin jituwa a tsakanin al'adu daban daban, a kokarin ganin yin mu'amala da yin koyi da juna ta fuskar al'adu sun taimaka wajen kara dankon zumuncin da ke tsakanin al'ummomin kasa da kasa, sa kaimi kan ci gaban zaman al'ummar dan Adam, da kiyaye zaman lafiya a duk duniya.(Maryam&Tasallah)