A yau ranar Litinin ne, muhimman kafofin yada labaru na kasar Rasha, ciki had da kamfanin dillancin labaru na Itar-tass suka jiyo daga bakin na hannun daman Victor Yanukovich na cewa, mista Yanukovich, wanda majalisar dokokin kasar Ukraine ta tube shi daga mukamin shugaban kasar, zai yi jawabi a birnin Rostov-on-Don da ke kudancin kasar Rasha a ranar 11 ga wata. Kuma ba da jimawa ba za a bayyana lokaci da kuma wurin da zai yi jawabin.
A ranar 28 ga watan jiya ne mista Yanukovich ya fito a fili a Rostov-on-Don, inda ya bayyana ra'ayinsa kan halin da Ukraine ke ciki a wani taron manema labaru, kuma a cewarsa, shi ne halataccen shugaban kasar ta Ukraine. Kuma majalisar dokokin Ukraine ta zartas da kudurin tube shi daga mukaminsa ne ba bisa doka ba. (Tasallah)
