A yau Talata ran 14 ga wata ne, shugaban kasar Bulgaria Rosen Plevneliev wanda a halin yanzu ke ziyarar aiki a kasar Sin ya ziyarci Gidan Rediyon CRI, inda ya gana da shugaban CRI, kana ya ba shi lambar girmamawa ta musamman don nuna godiya kan babbar gudummawa da CRI ya samar dangane da mu'amalar al'adu dake tsakanin kasar Bulgaria da kasar Sin da kuma mu'amalar dake tsakanin kasar Sin da kasa da kasa.

Shugaba Plevnelie ya bayyana cewa, CRI ta yi amfani da harsuna guda 65 wajen watsa labaran kasar Sin, gabatar da nasarorin da kasar Sin ta samu wajen raya kasa da kuma burinta, wannan aiki na da muhimmiyar ma'ana ga duk duniya. Ya kuma kara da cewa, jama'ar kasar Bulgaria sun mai da hankali da kuma nuna yabo ga sabon shirin gwamnatin kasar Sin wajen raya kasa, kasar Bulgaria tana son yin hadin gwiwa tare da kasar Sin don tallafa wa al'ummomin kasashen biyu da kuma kiyaye zaman lafiya da zaman karko na kasa da kasa. (Maryam)