A ranar 18 ga wata, M.D.D. ta ba da rahoto game da hasashen yanayin tattalin arzikin duniya na shekarar 2014, inda ta bayyana cewa, tattalin arzikin duniya da ya samu koma baya a wadannan shekaru, zai samu kyautatuwa cikin shekaru 2 masu zuwa, an kimanta cewa, tattalin arzikin duniya zai karu da kashi 3.0 cikin 100 a shekarar 2014, kuma wannan adadi zai karu da kashi 3.3 cikin 100 a shekarar 2015, amma, duk da haka zai fuskanci rashin tabbas da yiwuwar koma bayan.

A cikin rahoton, an bayyana cewa, a cikin kasashe masu wadata, tattalin arzikin Amurka zai karu da kashi 2.5 cikin 100 a shekarar 2014, yayin da tattalin arziki na kasashen Turai ya samu kyautatuwa a shekarar 2013.

Rahoton ya ce, a yankunan kasashe masu tasowa, tattalin arzikin kasashen Afrika zai samu babban ci gaba, kuma an yi hasashe cewa, tattalin arzikin kasashen Afrika zai karu da kashi 4.7 cikin 100 a shekarar 2014. Kana, yankin da ke gabashin Asiya zai ci gaba da kasancewa wani yankin da ya fi samun bunkasuwa a duniya, an kiyasta cewa, tattalin arziki na yankin zai karu da kashi 6.1 cikin 100 a shekarar 2014 da ta 2015, cikinsu, tattalin arzikin Sin zai samu karuwa da kashi 7.5 cikin 100.(Bako)