Bisa labarin da jaridar Tishreen na Oktoba ta kasar Syria ta bayar, an ce, shugaban kasar Bashar al-Assad ya bayyana cewa, gwamnatinsa ba za ta yi shawarwari tare da 'yan ta'addan kasa ba, har sai sun aje makamansu, kuma gwamnatin kasa ba za ta nemi taimako daga kasashen waje ba don warware harkokin cikin gidanta. Shugaba Assad ya kuma bayyana cewa, kasar Syria za ta halarci taron shawarwari da za a yi a birnin Geneva, idan an yarda da warware matsalar Syria bisa ka'idojin kasa da kuma yin shawarwari kan harkokin siyasa kawai.

Mr. Bashar ya kuma bayyana cewa, tun da dadewa, kasar Syria ta shirya yin taron shawarwari a birnin Geneva, amma kasar Amurka da wasu kasashen da ke goyon bayan Amurka a yankin suka jinkirta da shi.

Da yake tsokaci kan batun makamai masu guba, shugaba Bashar ya nuna cewa, kasar ta fara sarrafa makamai masu guba tun a shekarar 1980s, amma ta riga ta dakatar da wannan aiki a karshen shekarar 1990s.

Ya ce, an riga an kawar da bukatun makamai masu guba a kasar tun farkon karni na 21, shi ya sa, a shekarar 2003, Syria ta gabatar wa kwamitin sulhu na MDD daftarin kawar da makamai masu guba a yankin Gabas ta Tsakiya, amma kasar Amurka ita ce ta hana fitar da daftarin.

Bugu da kari, ran 6 ga wata, cikin wata sanarwar da kungiyar sojojin Syria ta "Free Syrian Army" ta bayar, ta jaddada cewa, ba za ta yi shawarwari ba, har sai Bashar al-Assad ya sauka daga mukaminsa. Cikin sanarwar, kungiyar ta kuma yi kira ga bangarori daban daban da su cimma ra'ayi daya kan harkar. (Maryam Yang)