Ranar Litinin 30 ga wata, Hong Lei, kakakin ma'aikatar harkokin wajen kasar Sin ya bayyana a yayin taron manema labaru da aka saba shiryawa a nan Beijing cewa, kasar Sin ta yi kira ga sassa daban daban na kasar Syria masu ruwa da tsaki da su tsagaita bude wuta cikin hanzari, a kokarin warware rikicin kasar ta hanyar yin tattaunawa.

Hong Lei ya kara da cewa, kullum kasar Sin na ganin cewa, warware batun Syria a siyasance, ita ce hanya daya kacal da za a iya bi. Don haka kasar Sin za ta ci gaba da yin iyakacin kokarinta tare da sauran kasashen duniya wajen aiwatar da kudurori da shawarwarin da abin ya shafa, a kokarin ba da gudummowa a fannin warware batun na Syria yadda ya kamata daga dukkan fannoni kuma cikin dogon lokaci.(Tasallah)