An kama manyan shugabannin jam'iyyar 'yan uwa musulmi ta kasar Masar, ciki har da kakakin jam'iyyar Gehad El-Haddad, da sauran jami'ai biyu a jiya Talata a birnin Alkahira na kasar ta Masar. A wannan rana kuma, kotun hukunta masu aikata manyan laifukka da ke Alkahira ta yanke hukuncin haramta wa jam'iyyar da wasu shugabannin kungiyoyin musulunci yin amfani da kadarorinsu na dan wani lokaci.

Kamfanin dillancin labaru na MENA na kasar Masar ya ruwaito hukumomin tsaron kasar na cewa, 'yan sandan kasar sun kama Gehad El-Haddad a wani gida dake birnin Nasr wanda ke arewa maso gabashin Alkahira, yayin da kuma aka kama wasu manyan jami'an jam'iyyar 'yan uwa musulmi, ciki har da Hossam Abu El-Bakr da Mahamoud Abu Zeid. A yanzu haka ana tsare da su a gidan kurkuku na Torah, don yi musu bincike kan zargin tayar da hankali da amfani da karfin tuwo, da yi wa masu zanga-zanga kisan gilla.

An ce, Gehad El-Haddad shi ne daya daga cikin muhimman kakakin jam'iyyar 'yan uwa musulmi a yayin da Mohamed Morsi ya rike kujerar shugabancin jam'iyyar na kasa, a lokacin kuma ya taba yin mu'amala da kafofin watsa labaru na kasashen ketare. (Bilkisu)