A ranar 19 ga wata, a birnin Lanzhou da ke kasar Sin, firaministan kasar Li Keqiang ya shugabanci taron tattaunawa kan yadda za a sa kaimi ga ayyukan raya yankunan yammacin kasar Sin da taimakawa matalautan kasar.

Firaministan Li ya bayyana cewa, raya tattalin arziki cikin dogon lokaci, da kyautata zaman rayuwar al'umma, da sa kaimi ga samar da daidaito a zamantakewar al'umma sun zama manyan ayyuka a gaban gwamnati mai ci yanzu. Don haka, dole ne a dauki manufar tattalin arziki daga manyan fannoni. Yanzu, lokaci ya yi da a canja salon raya tattalin arziki, ya kamata a kyautata batun raya tattalin arziki cikin dogon lokaci, a kokarin raya tattalin arziki da kyautata zaman rayuwar al'umma gaba daya.

Li Keqiang ya ce, yanzu ba a raya tattalin arziki cikin daidaito a tsakanin birane da yankunan karkara da kuma tsakanin yankuna daban daban, sabo da haka, akwai sauran rina a kaba wajen raya tattalin arziki na yankunan tsakiya da yammacin kasar Sin. Kamata ya yi a mai da hankali wajen raya muhimman ababen more rayuwa a yankunan yammacin kasar, da kuma karfafa zukatan kwararru da su yi zama a wurin.

Haka kuma, firaministan Li ya kara da cewa, yayin da ake raya yankunan yammacin kasar, dole ne a ba da tabbaci wajen kyautata zaman rayuwar al'umma, da inganta hadin gwiwa tsakanin mutane na kabilu daban daban don su samu ci gaba da wadata tare.(Bako)